سلام پرېس 
د فراه ولایت د عامې روغتیا ریاست مسوولینو د دغه ولايت په ولايتي روغتون کې د نري رنځ د تشخيص لپاره د جن اکسپرټ په نوم د دستګاه فعالېدو خبر ورکړی دی. د یاد ولایت د عامې روغتيا ریاست مسوولینو د يادې دستګاه د پرانیستلو پر مهال وویل چې په ولايتي روغتون کې د UNDP مؤسسې له لوري د ٢٠ زره امریکایي ډالرو په لګښت د نري رنځ د تشخيص لپاره د جن اکسپرټ دستګاه فعاله شوې ده. د مسوولینو په خبره تردې وړاندې به د فراه مېشتو خلکو د نري رنځ د تشخيص لپاره لرې ولايتونو ته سفرونه کول او ډېر لګښتونه پرې لګېدل خو اوس د عامې روغتیا وزارت په همغږي او د UNDP مؤسسې پر مالي همکارۍ د دغه ولایت په ولایتي روغتون کې د جن اکسپرټ دستګاه فعاله شوې چې ورسره به ډېرې آسانتياوې رامنځته شي.
