سلام پرېس 
د کندوز د کرنې، اوبولګولو او مالدارۍ ریاست مسوولین وايي، چې هرکال ۲۵۰۰ ټنه د چرګانو غوښه بازارته وړاندې کېږي. د کندوز ولايت د کرنې اوبو لګولو او مالدارۍ ریاست د مالدارۍ او حیواني روغتيا آمر ډاکتر نجیب الله حسن ویلي چې په دې ولایت کې د چرګانو ۱۳۰۰ فارمونه شتون لري، چې په دې فارمونو کې د نورو کلونو په پرتله ۵۰ سلنه زیاتوالی راغلی چې له امله یې له دغو فارمونو څخه هرکال ۲۵۰۰ ټنه غوښه بازار ته وړاندې کېږي. نوموړي زیاته کړه، چې د دغو فارمونو د ډېروالي یواځېنی لامل له دوه کیلو څخه ډېره اندازه بهرنیو چرګانو واردول، د چرګانو فارم لرونکو ته پر وخت واکسین وېشل او په دې برخه کې د یو شمېر موسسو مسوولینو سره همغږۍ ده چې په فارمونو کې زیاتوالی راغلی.
